Faisal trivst i eit miljø kor han kan utvikle seg vidare
Faisal flykta frå Libanon til Noreg som 17-åring. Der har han funne ei tryggare framtid og ein jobb med meining i Sjukehusapotek Vest. No siktar den sporty apotekteknikaren på vidareutdanning som farmasøyt.
Faisals reise frå Libanon til Norge som 17-åring var ikkje berre ei fysisk forflytting, men eit skritt mot ei framtid prega av tryggheit og moglegheiter.
- I Libanon fekk vi ikkje gått på skule. Vi budde i Syria frå eg gjekk i første klasse til eg gjekk i sjuande klasse. Etter det fekk eg ikkje gått på skule, fortel han.
- Det går fint å bu i Noreg. Vêret er ikkje så mykje å skryte av, men heldigvis har det ikkje gått utover humøret mitt førebels, flirar han.
Medan han gjekk på vidaregåande i Førde bestemte han seg for å ta utdanning som apotekteknikar. Dermed måtte han flytte til Bergen for å ta siste året på apotekteknikarlinja ved Åsane Vidaregåande skule.
Det var noko eg valde først og fremst fordi eg likar å jobbe med menneske. I tillegg synst eg det er spennande å jobbe med medisinar, så då tenkte eg at apotekteknikar var noko som ville passe meg bra, seier Faisal.
Verd å vente på
Då dei skulle søkje om praksisplass var Faisal klar på kva han ønskte seg.
- Eg ville gjerne ta praksisen min hos Sjukehusapoteka Vest sidan det er fleire avdelingar og meir å lære. Eg hadde Sjukehusapoteket i Førde som førsteval, men det gjekk ein stund før eg fekk svar. I mellomtida fekk eg tilbod frå andre apotek, men eg venta til Gunvor hadde svart meg. Då eg fekk ja frå Sjukehusapoteket avviste eg dei andre med ein gong, glisar Faisal.
Då han var ferdig med utdanninga i Bergen flytta han heim til Førde og fekk tilbod om eit årsvikariat ved Sjukehusapoteket i Førde. Noko som seinare blei til ei fast stilling. No stortrivst han i splitter nye apoteklokale i publikumsavdelinga.
- Eg har veldig gode kollegaer, og vi har kjekke kundar. Det er fint å kjenne på å du gjer ein jobb som har meining. Eg likar å hjelpe andre, så det kjekt både for meg og dei som får hjelp.
For Faisal var det viktig frå starten av å finne eit yrke som han kunne trivst med.
Det er ikkje berre ein dag ein skal jobbe i det yrket. Det er mange år. Her jobbar eg ein plass der eg kan utvikle meg vidare. Viss eg vil prøve meg i ei anna avdeling er det moglegheiter for det, seier Faisal.
Tolken
Hos Sjukehusapoteket i Førde er det fleire nasjonalitetar representert blant dei tilsette. Det kjem godt med når kundane ikkje alltid pratar så godt engelsk. Ved apoteket i Førde har Faisal sin kjennskap til arabisk kome godt med.
- Det er vanskeleg å gje viktig informasjon om bruk av legemiddel når ein ikkje pratar same språk. Eg pratar arabisk, og det er det nokre kundar som har lagt merke til. Så eg har fått nokre faste kundar her som likar å komme her fordi dei veit at dei kan prate arabisk med meg.
Det siste året har det særleg vore ei auke i talet på ukrainarar i ved apoteket.
- Då har vi litt problem, for nokre av dei pratar ikkje engelsk heller. Vi har ein kollega som jobbar i produksjonen som kan ukrainsk. Så dersom han er ledig hender det at vi ringer etter han.