Bisharo er apotekar ved vårt minste apotek
Etter to år ute i det private valte Bisharo å vende tilbake i Sjukehusapoteka Vest (SAV), der ho no leier apoteket på Haraldsplass. – Det var alltid eit mål for meg å komme tilbake, seier ho.
Bisharo Osman jobba ved sjukehusapoteket i Bergen frå 2017 til 2022 og var ein godt likt kollega fram til ho slutta. No er ho tilbake der karrieren starta.
- Det har vore veldig kjekt å komme tilbake til tidlegare kollega. Eg har mange kjent her, både frå studietida og frå dei fem åra eg jobba her. Eg blir varm i sjela når folk blir glad for å sjå meg igjen, fortel ho.
Det faglege har vore ein viktig drivar for at Bisharo søkte seg tilbake til Sjukehusapoteka Vest.
- Faget står sterkare i SAV og arbeidskvardagen er meir variert her. Det er ein annan kvardag i sjukehusapoteket. Der får ein sett medisinar og behandlingar som du aldri ville sett i eit privat apotek. Det synst eg er spennande.
Som apotekar på det minste apoteket i Sjukehusapoteka Vest blir ho ikkje noko kontorrotte. Her må alle dei tilsette i sving for å halde hjula i gang.
- Eg er ein del på golvet. Eg må gjere noko anna enn berre kontorarbeid. Målet mitt er å vere i drift, både i sjukehusekspedisjonen og publikum, når eg kan. Det gir meg ei betre oversikt over kva som skjer der ute, men det gir meg og moglegheita til å bli betre kjent med dei tilsette og korleis arbeidsmiljøet er.
- Planen var alltid å komme tilbake
Bisharo begynte i publikumsavdelinga ved sjukehusapoteket i Bergen medan ho skreiv masteroppgåva ved Universitet i Bergen i 2017. Ho hadde praksisperioden sin ved sjukehusapoteket i Bergen og fekk seinare fast stilling og begynt så å jobbe i produksjonsavdelinga. I 2022 søkte ho seg likevel vekk og begynte som styrar ved Vitusapotek på Knarvik senter, nord for Bergen.
- Eg ønskte å ta eit steg vidare i karrieren og prøve med som leiar. Sidan moglegheitene for leiarerfaring ikkje dukka opp i SAV måtte eg forsøke meg i det private.
Etter å ha jobba eit halvt år som styrar i Knarvik starta ho som apotekar ved Vitusapotek Fisketorget i Bergen Sentrum.
- Det var kjekt å bli apotekar. Vi hadde eit veldig fint arbeidsmiljø og fin arbeidsplass.
Så dukka stillinga som apotekar på Haraldsplass opp på radaren til Bisharo.
- Planen min var alltid å komme tilbake, så eg er glad for at eg fekk den moglegheita no.
Engasjert dame
Ved sidan av jobb er Bisharo ein aktiv dame som engasjerer seg både fagleg og i lokalmiljøet.
- Eg er aktiv i norsk farmasøytselskap, kor eg sit i styret her i Bergen. Eg er ansvarleg for unge farmasøytar der vi arrangerer seminar og jobbar med fagleg påfyll.
Men det er ikkje berre purunge studentar som er med i gruppa.
- Det det handlar ikkje so mykje om alder, men meir om at ein ønskjer å halde seg oppdatert fagleg. Alle studentar, nye farmasøytar og alle som ønskjer å halde seg oppdatert er velkommen til oss.
I nettverket arrangerer dei seminar og sosiale happenings.
- No sist hadde vi eit kveldsføredrag om diabetes. Då hadde vi ein fagperson inne frå RELIS.
I tillegg jobbar ho mykje med fleire frivillige organisasjonar.