Første helga i oktober samlast nesten 200 i Sjukehusapoteka Vest til fagleg og sosialt treff Solstrand. Den raude tråden på samlinga får namnet "Gode saman".
- Vi har fått mange innspel til kva samlinga kunne handle om. Fleire av dei peika i ei retning som vi fann ut vi kunne samle under overskrifta "Gode saman", seier Kristine Hatlestad, produksjonfarmasøyt på Sjukehusapoteket i Bergen og med i arrangementskomiteen til samlinga.
Sjå Gode saman frå fleire perspektiv
Kristine fortel at ein skal prøve å sjå "Gode saman" frå fleire perspektiv i løpet av laurdagen på Solstrand.
- Det kan jo eigentleg bety så mykje. Det kan vere kva vi har vore gode saman på før, kvar og kva vi treng å vere gode saman på i framtida, korleis vi kan vere gode saman og meir til.
Ho legg til at ein del av poenget med temaet også er å skape refleksjon rundt kva gode saman kan bety for oss.
- Det er sjølvsagt begrensa kor breitt og djupt vi kan gå inn i dette i løpet av ein dag, men kanskje kan vi bidra til å så nokre gode frø, smiler ho.
Kristine likar elles å ta bilde på fritida, og på Solstrand blir ho også å sjå høgt og lågt som samlinga sin fotograf.
